كتير بيسألوني ناكل ايه و مناكلش ايه علشان الحساسية ..
الرصة اللي كنا بنقولها زمان دي معدش ليها قيمة و مش صح . يعني مش هقولك متاكلش اللبن والسمك والبيض والموز والشيكولاتة والفراولة والمانجة وغيره وغيره لان الناس كلها مش زي بعضها. يعني في ناس عندها حساسية صدر وعفاريت في اكل السمك ومش بيتعبهم وناس معندهاش حساسية تتعفرت من سمكاية واحدة وتتعب .
يبقي انا هقولك بطل اللي انت عارف انك تعبان منه . ولو متعرفش تابع نفسك و شوف لو تعبت مثلا راجع اكلت ايه وشربت ايه وشميت ايه او حتي لبست ايه.
طب ابني كان بيلعب رياضة و قعدته علشان الحساسية. مين قال؟ يلعب يا ست الكل وينبسط و السباحة بالاخص ممتازة جدا لحساسية الصدر.
طب ابني قعدته في أوضة لوحده علشان ميعديش اخواته ومبقتش انام جنبه علشان ميعدنيش و اكح. بردو مين قال؟؟ الحساسية ليست معدية علي الاطلاق .
الامور بسيطة ان شاء الله لكن للأسف مع تهويل بعض الامهات للموضوع ده ممكن يعمل مشاكل نفسية عند الطفل المصاب بالحساسية بتخليه يخاف يلعب. يخاف ينزل من البيت. يخاف يروح النادي.
